შეერთებულ შტატებში მიღებულ გადაწყვეტილებას სანქციების დაწესებასთან დაკავშირებით, თბილისში აფასებენ. პარტია ,,სტრატეგია აღმაშენებელის” გენერალური მდივანი, პაატა მანჯგალაძე ფიქრობს, რომ ეს არ არის ერთადერთი ქმედება და მოსალოდნელია სხვა ქმედებებიც.
,,ეს არის დასაწყისი, ეს არ არის ერთადერთი ქმედება. ამის იქით, კიდევ იქნება სხვა ქმედებებიც. ნეგატიური ასახვა ექნება ამას ჩვენს მოქალაქეებზე, რადგან სანქცირებული მთავრობა რამდენი ხანიც იქნება ხელისუფლებაში, ვერანაირ სიკეთეს ვერ მოუტანს ხალხს,” – აცხადებს პაატა მანჯგალაძე.
განცხადება საკითხთან დაკავშირებით გააკეთა საპარლამენტო პოლიტიკური ჯგუფის ,,რეფორმების ჯგუფი” წევრმა, თეონა აქუბარდიამ.
,,სანქციების მეშვეობით, იზრდება ქართველი ხალხის მხარდაჭერა, რათა ჩვენ დავრჩეთ დემოკრატიული და ევროპული კურსის სადარაჯოზე და ეს არის დამატებითი კიდევ ერთი გზავნილი ,,ქართული ოცნებისთვის”, რომ არ წაიყვანოს ქვეყანა ბოლომდე ავტორიტარიზმისკენ,” – აცხადებს თეონა აქუბარდია.
შეგახსენებთ, რომ ამერიკამ სავიზო შეზღუდვების პირველი პაკეტი გამოაცხადა. სახელმწიფო დეპარტამენტმა სანქციები “ქართული ოცნების” წევრებს, დეპუტატებს, სამართალდამცველებსა და კერძო პირებს დაუწესა. მათ შორის იმ ინდივიდებსა და მათ ოჯახის წევრებს, ვინც სახელმწიფო დეპარტამენტის პრეს-სპიკერის განმარტებით, პასუხისმგებელია ან არის თანამონაწილე საქართველოში დემოკრატიისთვის ძირის გამოთხრაზე. საუბარია 20-დან 30-მდე პირზე, რომელთა ვინაობა არ საჯაროვდება. მეთიუ მილერის განმარტებით, სავიზო მონაცემები კანონით კონფიდენციალურია, ამიტომ კონკრეტულ გვარებს ის ვერ დაასახელებს.
